سجاد حسين ڀٽي: نامياري زرعي ۽ تعليمي ماهر سجاد حسين ڀٽي، 14 جولاءِ 1939ع تي پنجاب جي ڳوٺ گليانا ۾ عنايت علي حسين ڀٽيءَ جي گهر ۾ جنم ورتو. سندس والد ان وقت سنڌ جي ٻيلي کاتي ۾ آفيسر هو، جنهن جي نوڪري سبب سندس ٻالڪپڻ جو ڳچ حصو سنڌ جي مختلف شهرن ۾ گذريو. اهڙيءَ طرح جيئن هن هوش سنڀاليو ته پاڻ کي سنڌ ڄائو سمجهڻ لڳو. سجاد حسين پرائمري تعليم ڪنڌڪوٽ ۽ ڪنڊياري مان ۽ مئٽرڪ گورنمينٽ هاءِ اسڪول نوابشاهه مان پاس ڪرڻ بعد زرعي ڪاليج ٽنڊي ڄا۾ ۾ داخل ٿيو، جتان هن پلانٽ پئٿالاجي ۾ ڊگري ورتي ۽ اتي ئي پهريان ڊمانسٽريٽر طور ملازمت اختيار ڪئي. سجاد حسين ڀٽي بطور شاگرد ڪاليج جي سماجي سرگرمين جو روح روان هو. ان دوران هن ڪاليج ۾ ڪافي اسٽيج ڊرامن ۾ به ڪم ڪيو. هن ڪجهه عرصو زرعي ڪاليج ٽنڊي ڄام ۾ نوڪري ڪئي، بعد ۾ اها نوڪري ڇڏي زرعي تربيتي اداري سڪرنڊ ۾ ان وقت جي ڪلاس ٽو ڪيڊر ۾ سينئر انسٽرڪٽر طور ڀرتي ٿيو، جتي پاڻ وائيس پرنسپال ۽ پوءِ پرنسپال به رهيو. سجاد حسين ڪاليج کي جديد تعليم ڏانهن وٺي ويو، جتي هن پهريون ڀيرو ڇوڪرين لاءِ الڳ اڪيڊمڪ بلاڪ ۽ هاسٽل منظور ڪرائي انهن لاءِ زرعي تعليم جو بنياد وڌو. سکيا وٺندڙ شاگردن ۽ آفيسرن لاءِ الڳ الڳ ميل- فيميل هاسٽلون ٺهرايون، عملي جي رهائش لاءِ جديد ڪالوني تعمير ڪرائي، اداري ۾ هڪ وڏو آڊيٽوريم هال ۽ شاگردن جي عملي سکيا لاءِ ليبارٽريون قائم ڪرايون. هن بطور سينئر انسٽرڪٽر ۽ پرنسپال جي هزارين شاگرد منظرعام تي آندا. هن هڪ زرعي ماهر جي حيثيت ۾ آمريڪا، برطانيا، اٽلي، فرانس، بئنڪاڪ، فلپائن، جي مختلف ادارن مان سکيا حاصل ڪري زرعي تربيتي اداري سڪرنڊ ۽ آبادگارن سان رابطي وارن پروگرامن کي اڳتي وڌايو. هن اتر سنڌ جي شاگردن لاءِ جيڪب آباد لڳ الڳ زرعي تربيتي ادارو قائم ڪرايو. ان کان سواءِ هن زرعي توسيعي کاتي ۾ ڊپٽي ڊائريڪٽر کان سواءِ آئل سيڊ ڊولپمينٽ پراجيڪٽ ۾ پراجيڪٽ ڊائريڪٽر طور به خدمتون سرانجام ڏنيون. ان بعد کيس ترقي ڏئي ڊائريڪٽر ٽريننگ مقرر ڪيو ويو. ان دوران هن کاتي جي نوجوان آفيسرن ۽ هارين جي حوصلا افزائي ڪرڻ خاطر عالمي بئنڪ، ايشيائي ترقياتي بئنڪ، برٽش ڪائونسل ۽ ٻين عالمي ادارن سان رابطا ڪري کين پرڏيهه سکيا لاءِ موڪليو. سندس دؤر ۾ وڌ کان وڌ آفيسر ٻاهران سکيا وٺي موٽيا، جيڪي اڄ زرعي شعبي ۾ پنهنجي جدا سڃاڻپ قائم ڪري چڪا آهن. هن ڊائريڪٽر ٽريننگ جي حيثيت ۾ رٽائر ڪيو، پر رٽائرمنٽ کانپوءِ به زرعي تربيتي اداري سڪرنڊ ۾ رضاڪارانه طور نوجوانن کي ليڪچر ڏيندو رهيو. هي پنهنجي شعبي سان نهايت ئي سچو رهيو. سجاد حسين ڀٽيءَ 13 مئي 2011ع تي وفات ڪئي.
1939.07.14 عيسوي
نامياري زرعي ۽ تعليمي ماهر سجاد حسين ڀٽي، 14 جولاءِ 1939ع تي پنجاب جي ڳوٺ گليانا ۾ عنايت علي حسين ڀٽيءَ جي گهر ۾ جنم ورتو.
2011.05.13 عيسوي
سجاد حسين ڀٽيءَ 13 مئي 2011ع تي وفات ڪئي.